დღეს, თბილისის საქალაქო სასამართლოში, დედაქალაქის მერის, გიგი უგულავას წინააღმდეგ სისხლის სამართლის საქმის განხილვა იწყება. წინასასამართლო სხდომაზე უგულავამ თავისი საქმის ნაფიცი მსაჯულების მიერ განხილვაზე უარი იმ მიზეზით თქვა, რომ, თითქოსდა, ნაფიც მსაჯულთა ჩარევის შემთხვევაში, უფრო მეტი გაუგებრობა იქნებოდა. წინასასამართლო სხდომაზე ადვოკატებმა გიგი უგულავასა და დავით კეზერაშვილის მიმართ სისხლის სამართლებრივი დევნის შეწყვეტის შესახებ შუამდგომლობა დააყენეს, თუმცა მოსამართლე, მერაბ ჯორბენაძემ შუამდგომლობა არ დააკმაყოფილა. პროკურატურა უგულავას შპს "თბილსერვისჯგუფთან" და ტელეკომპანია "იმედთან" დაკავშირებულ საკითხებს ედავება. უგულავა სისხლის სამართლის კოდექსის 194-ე და 182-ე მუხლებით არის ბრალდებული, რაც სხვის ქონების მართლსაწინააღმდეგო მითვისებასა და უკანონო შემოსავლების ლეგალიზაციას გულისხმობს.
