შინაგან საქმეთა მინისტრი ირაკლი ღარიბაშვილი დღეს სამინისტროს შენობაში რუსეთ-საქართველოს ომის დროს დაღუპულ შსს-ს თანამშრომლების ოჯახის წევრებს შეხვდება. მინისტრი დაღუპული პოლიციელების შვილებს საჩუქრებს გადასცემს. 2008 წელს, რუსეთ-საქართველოს ომის დროს, შინაგან საქმეთა სამინისტროს 14 თანამშრომელი დაიღუპა. ამ თემაზე შს მინისტრმა გუშინ, თელავში კახეთის საპატრულო პოლიციისთვის ავტომანქანების გადაცემის ცერემონიალზე ისაუბრა. „ახლოვდება 8 აგვისტო. 5 წლის წინ სწორედ ამ პერიოდში ჩვენ ქვეყანას დიდი განსაცდელის გამოვლა მოუწია. რუსეთ-საქართველოს ომმა დიდი დანაკლისი მოგვიტანა - ოკუპირებული ტერიტორიები, იძულებით გადაადგილებული ჩვენი თანამემამულეები, დაჭრილები, დაღუპულები. ძვირფასო პოლიციელებო, პატივი უნდა მივაგოთ იმ პირთა ხსოვნას, რომლებიც ტერიტორიული მთლიანობისთვის ბრძოლას შეეწირნენ, მათ შორის შინაგან საქმეთა სამინისტროს გმირი თანამშრომლებიც იყვნენ. მჯერა, რომ მათ თავგანწირვას ფუჭად არ ჩაუვლია. ჩვენ მხოლოდ გააზრებული, თანმიმდევრული და ქმედითი ნაბიჯების შედეგად, ახლო მომავალში შევძლებთ გაერთიანებული საქართველოს საზღვრის არეალში საზოგადოებრივი წესრიგის უზრუნველყოფას, იმ წესრიგის დანერგვას, რომელიც ქართულ პოლიციაში დღეს ხორციელდება", - განაცხადა ღარიბაშვილმა.
