"მე მზად ვარ დავადასტურო ჩემი სიმართლე, მიუხედავად იმისა, რომ პროკურატურამ უნდა დაადასტუროს ჩემი ბრალი. შევეცდები დავადასტურო, რომ ჯოზეფ ქეი არის ჩვეულებრივი აფერისტი. ორივე ბრალდება არის აბსურდული", - ამის შესახებ თბილისის საქალაქო სასამართლოში, საქმის არსებითი განხილვის დაწყებამდე დედაქალაქის მერმა, გიგი უგულავამ განაცხადა. 
სასამართლოში გიგი უგულავას წინააღმდეგ სისხლის სამართლის საქმის არსებითი განხილვა უკვე დაიწყო. პროკურატურა უგულავას შპს "თბილსერვისჯგუფთან" და ტელეკომპანია "იმედთან" დაკავშირებულ საკითხებს ედავება. უგულავა სისხლის სამართლის კოდექსის 194-ე და 182-ე მუხლებით არის ბრალდებული, რაც სხვისი ქონების მართლსაწინააღმდეგო მითვისებასა და უკანონო შემოსავლების ლეგალიზაციას გულისხმობს.