ქარელის რაიონის სოფელ ყინწვისში მცხოვრები ქოჩიშვილები შინაგან საქმეთა მინისტრს და პრეზიდენტს დახმარების თხოვნით მიმართავენ. ყინწვისში მცხოვრები ქოჩიშვილების ოჯახი 2013 წლის 19 დეკემბერს ნიღბიანმა და შეიარაღებულმა პირებმა დააყაჩაღეს. მძარცველებმა ოჯახის დიასახლისს სონია ქოჩიშვილს 3000 ლარი, ოქროულობა და მობილური ტელეფონი წაართვეს. მძარცველები ოჯახში ღამის 3 საათზე შეიჭრნენ და მათ ფიზიკურადაც გაუსწორდნენ, აღნიშნულის შესახებ თავად დაზარალებულები საუბრობენ.
„ჩვენ ქარელის პოლიციას მომხდარის შესახებ მაშინვე ვაცნობეთ, თუმცა, ამ დრომდე გამოძიება ჭიანურდება და შედეგი არაფერი არაა. დამნაშავეები ისევ გარეთ არიან, ჩვენ ყურადღებას არავინ გვაქცევს. მივმართავთ საქართველოს შინაგან საქმეთა მინისტრს, პრეზიდენტს, დაგვეხმარონ, რათა დროულად მოხდეს გამოძიება", - აცხადებს სონია ქოჩიშვილი.
