ყირიმში რუსეთის ქმედებების მხარდაჭერისთვის, რუსეთის სახალხო არტისტის სერგეი ბეზრუკოვის თბილისში დაგეგმილი სპექტაკლი გააუქმეს.
"საქართველოში არასოდეს არც ერთ მსახიობს არ ჩამოვიყვან, ვინც ანტიდემოკრატიულ გადაწყვეტილებას მიიღებს ჩვენი ქვეყნის წინაშე, ნებისმიერი ფორმით. ეს იგივეა, რომ მხარი დაუჭირონ აფხაზეთის და ცხინვალის რეგიონის ოკუპაციას", - აცხადებს კულტურის პალატის პრეზიდენტი დავით ოქიტაშვილი.
ამასთან დაკავშირებით, ოფიციალურ განცხადებას ავრცელებს საქართველოს კულტურის პალატაც.
„დღეს გავრცელებული რუსეთის სახალხო არტისტების წერილის გამო, რომელიც მხარს უჭერს რუსეთის პრეზიდენტს ვლადიმერ პუტინს მეზობელი ქვეყნის უკრაინის ტერიტორიის ოკუპაციაში, საქართველოს კულტურის პალატამ მიიღო გადაწყვეტილება, გაუქმდეს მაისში დაგეგმილი სერგეი ბეზრუკოვის თეატრის გასტროლები თბილისში. კიდევ ერთხელ გვინდა, გამოვუცხადოთ მხარდაჭერა უკრაინას მის სუვერენიტეტს ტერიტორიულ მთლიანობას და ჩვენ მეგობარ გმირ უკრაინელ ხალხს", - ნათქვამია განცხადებაში.
ყირიმის საკითხებში პუტინის პოზიციის მხარდამჭერი წერილი კულტურის სამინისტროს ოფიციალურ ვებგვერდზე რუსმა ხელოვანებმა გაავრცელეს, რომელსაც 86 ხელოვანი აწერს ხელს.
