„მიხარია, რომ ჩემი წიგნები საქართველოში პოპულარულია“, - ამის შესახებ ცნობილმა თურქმა მწერალმა ორჰან ფამუქმა „თავისუფალ უნივერსიტეტში“ გამართულ პრესკონფერენციაზე განაცხადა.
მისი თქმით, ქართული ლიტერატურის შესახებ თითქმის არაფერი სმენია - განაცხადა ფამუქმა და ამის გამო მოიბოდიშა.
„ჩემს წიგნებს იმიტომ თარგმნიან, რომ საერთაშორისო აღიარება აქვს მოპოვებული. თუ გინდა, რომ შენი ნაწარმოები ითარგმნოს, უნდა იყოს ცნობილი“, - აღნიშნა ორჰან ფამუქმა.
მისი თქმით, თუ წერა ძალიან გიყვარს, მაშინ გადარჩები, ხოლო საერთაშორისო ცნობადობა შეიძლება მოვიდეს, შეიძლება არა.
თურქმა მწერალმა საყვარელ მწერლებს შორის ტოლსტოი, თომას მანი, დოსტოევსკი და სხვები დაასახელა. ფავორიტ ნაწარმოებად კი „ანა კარენინა“.
მისი თქმით, მას აქვს ფიროსმანის წიგნი და ძალიან უყვარს მისი მხატვრობა.
„ფიროსმანი ქართული კულტურის ეროვნული განძია. ფილმიც მინახავს მასზე და დიდი შთაბეჭდილება მოახდინა ჩემზე. მას შესანიშნავი, ღრმა, გულუბრყვილო, დემონური მხატვრობა აქვს“, - აღნიშნა მწერალმა.
ორჰან ფამუქს „თავისუფალი უნივერსიტეტის“ საპატიო დოქტორის წოდება მიანიჭეს.
შეგახსენებთ, რომ ნობელის ლაურეატი თურქი მწერალი ორჰან ფამუქი საქართველოში თავისუფალი უნივერსიტეტისა და ბაკურ სულაკაურის გამომცემლობის ერთობლივი ძალისხმევით ჩამოვიდა.
