რეგიონებში საყოველთაო ჯანდაცვის პროგრამის მონიტორინგი გრძელდება. შრომის, ჯანმრთელობის და სოციალური დაცვის მინისტრის მოადგილე დიმიტრი მახათაძე, სოციალური მომსახურების სააგენტოს დირექტორი ნოე ქინქლაძე, მოადგილე კახა ხელაძე და საყოველთაო ჯანდაცვის პროგრამის მართვის დეპარტამენტის უფროსი რუსუდან გოგოლაშვილი გორში შიდა ქართლის რეგიონის კლინიკების ხელმძღვანელებს, პირველადი ჯანდაცვის ხელმძღვანელებს და სოფლის ექიმებს შეხვდნენ. შეხვედრის მიზანია სამინისტროს და სააგენტოს წარმომადგენლები ადგილზე გაეცნონ საყოველთაო ჯანდაცვის პროგრამის მიმდინარეობას, ნახონ რა მდგომარეობაა სამედიცინო დაწესებულებებში და მოისმინონ, როგორ მუშაობენ სოფლის ექიმები.
დღესვე, საქართველოს ყველა რეგიონში სამინისტროს დავალებით იკრიბებიან სოფლის ექიმები, რათა თითო რეგიონმა თითო წარმომადგენელი შეარჩიოს პირველადი ჯანდაცვის საბჭოში გასაწევრიანებლად. ამ დრომდე პირველადი ჯანდაცვის საბჭოში პირველადი ჯანდაცვის ექიმები შედიოდნენ და სოფლის ექიმი წარმოდგენილი არ იყო. მომდევნო კვირაში საბჭო ჯანდაცვის სამინისტროში ახალი შემადგენლობით შეიკრიბება, რათა სოფლის ექიმების პრობლემებზე და სამომავლო გეგმებზე იმსჯელოს.
