თბილისში, მოსაშვილის ქუჩაზე მდებარე რესტორანში მომხდარი ჩხუბის გამო სამართალდამცავებმა ხუთი პირი დააკავეს. როგორც შინაგან საქმეთა სამინისტროს საზოგადოებასთან ურთიერთობის სამსახურის ხელმძღვანელი , ნინო გიორგობიანი აცხადებს, საქმე აღძრულია სისხლის სამართლის კოდექსის 239-ე მუხლით, რაც ჯგუფურ ხულიგნობას გულისხმობს.
ამ დროისთვის არსებული ინფორმაციით, ჩხუბი მოსაშვილის ქუჩაზე მდებარე რესტორან "ლოფტში" წუხელ მოხდა. არაოფიციალური ინფორმაციით, ფიზიკურ შეხლა-შემოხლას სროლაც მოჰყვა.
პერსონალი წუხელ მომხდარი ჩხუბის ფაქტს ადასტურებს, თუმცა სროლის ფაქტს უარყოფს.
რესტორნის თანამშრომლები მომხდარს დეტალურად არ ყვებიან, თუმცა აცხადებენ, რომ ღამით სტუმრებს შორის ფიზიკური შეხლა-შემოხლა მოხდა, რაშიც რესტორნის დაცვა ჩაერია. დაცვის სამსახურის თანამშრომელს ფიზიკური დაზიანებები აღენიშნება.
