2008 წლის რუსეთ-საქართველოს ომის მეხუთე წლისთავთან დაკავშირებით საქართველოს საელჩოებში ისრაელში, პოლონეთსა და შვედეთში საჯარო ღონისძიებები გაიმართა. საგარეო საქმეთა სამინისტროს ინფორმაციით, 8 აგვისტოსთან დაკავშირებით, საელჩოებში მიწვეულ სტუმრებს რუსი რეჟისორის ანდრეი ნეკრასოვის დოკუმენტური ფილმი "რუსულის გაკვეთილები" უჩვენეს.
საღამოზე ადგილობრივი ქვეყნების პოლიტიკოსები, ექსპერტები, მედიის წარმომადგენლები მიიწვიეს. ისრაელში, საქართველოს საელჩოში გამართულ ჩვენებას საერთაშორისო ორგანიზაციებისა და კვლევითი ცენტრების წარმომადგენლებიც დაესწრნენ.
ფილმის ჩვენების შემდეგ, საელჩოს წარმომადგენლებმა ღონისძიების მონაწილეებს კიდევ ერთხელ გააცნეს 2008 წლის რუსეთ-საქართველოს ომის შემდგომ შექმნილი ვითარება, რუსეთის მხრიდან საერთაშორისო სამართლის ნორმების დარღვევის ფაქტები და ოკუპირებულ ტერიტორიებზე არსებული ვითარება.
