მთავარ პროკურატურასთან, პროკურორის, არჩილ კბილაშვილისა და უზენაესი სასამართლოს თავმჯდომარის, კონსტანტინე კუბლაშვილის გადადგომის მოთხოვნით საპროტესტო აქცია დასრულდა. საპროტესტო გამოსვლის ორგანიზატორები პოლიტიკური მოძრაობა "საქართველოს პატრიოტთა ალიანსი", "წინააღმდეგობის მოძრაობა" და მედია კავშირი "ობიექტივი" იყვნენ.
ირმა ინაშვილის განცხადებით, მთავარი მოთხოვნა არჩილ კბილაშვილისა და კონსტანტინე კუბლაშვილის თანამდებობიდან გადადგომა იყო.
„ უნდა გასამართლდეს "ნაციონალური მოძრაობა" და დაისაჯოს ყველა ყოფილი მაღალჩინოსანი, ვისაც დანაშაული მიუღძვის."- აღნიშნა ინაშვილმა „რეპორტიორთან" საუბარში.
"გადადგეს კბილაშვილი", "გასამართლდეს რეჟიმი", "კოჰაბიტაცია შეთქმულებაა", "შეწყდეს კოჰაბიტაცია" ამ ლოზუნგებით მოითხოვდნენ სამართლიანობის აღდგენას აქციის მონაწილეები.
აქციის მსვლელობისას მცირე ინციდენტიც მოხდა, მას შემდეგ, რაც მთავარი პროკურატურის შენობასთან სოსო რობაქიძე გამოჩნდა. მან დღევანდელი აქცია გააპროტესტა. ის მიიჩნევდა, რომ აქცია არა პროკურატურასთან არამედ კონსტანტინე კუბლაშვილთან უნდა გამართულიყო. აქციას მან შეკვეთილი უწოდა. აქციის მონაწილეები მას შეეპასუხნენ, თუმცა ინციდენტი მალევე ამოიწურა, რადგან მან ტერიტორია მალევე დატოვა.
