1905 წლის 24 მარტს, ფრანგი მწერალი ჟიულ ვერნი გარდაიცვალა.

ჟიულ გაბრიელ ვერნი 1828 წლის 8 თებერვალს, საფრანგეთის ქალაქ ნანტში დაიბადა.

კლასიკური სათავგადასავლო ლიტერატორი და მეცნიერულ-ფანტასტიკური რომანის ჟანრის ერთ-ერთი ფუძემდებელი, ადვოკატის, პიერ ვერნის ოჯახში დაიბადა. დედა - სოფი ალოტ დე ლა ფიუ გახლდათ.

ჟიულ ვერნი პირველი ვაჟიშვილი იყო ხუთიდან. მის შემდეგ დაიბადნენ: ძმა პოლი და დები: ანა მატილდა და მარი.

ვერნის მეუღლე ონორინა დე ვიანი გახლდათ. მას პირველი ქორწინებიდან ჰყავდა ორი შვილი.

1856 წლის 20 მაისს ჟიულ ვერნი ამიენში თავისი მეგობრის ქორწილში ჩამოვიდა, სადაც პირველად იხილა მომავალი მეუღლე. რვა თვის შემდეგ, 1857 წლის 10 იანვარს ისინი დაქორწინდნენ და მოგვიანებით საცხოვრებლად გადავიდნენ პარიზში, სადაც ვერნი უკვე რამდენიმე წელი ცხოვრობდა. ოთხ წელიწადში, 1861 წლის 3 აგვისტოს ჟიულ ვერნის ორონინასგან შეეძინა მიშელი, მათი ერთადერთი შვილი. შვილის დაბადებისას ჟიულ ვერნი არ იმყოფებოდა პარიზში, იმ დროს იგი სკანდინავიაში მოგზაურობდა.

ვერნის ლიტერატურული მოღვაწეობა დაიწყო პიესების წერით, მაგრამ წარმატებას ვერ მიაღწია. 50-იანი წლების დასასრულს გადაწყვიტა შეექმნა მეცნიერული რომანი, რომელიც, მისივე თქმით, "შეაერთებდა გუშინდელ რომანტიზმს დღევანდელ რეალიზმთან და ხვალინდელი დღის სიმბოლოსთან". მან დაიწყო მეცნიერული დარგების საფუძვლიანი შესწავლა. აქვეყნებდა მოთხრობებს, პოპულარულ ნარკვევებს, წერილებს, სახელი მოუხვეჭა 1862 წელს გამოქვეყნებულმა რომანმა "ხუთი კვირა საჰაერო ბურთზე", ამის შემდეგ ჟიულ ვერნიმ შექმნა "არაჩვეულებრივი მოგზაურობის" 65-ტომიანი ისტორია, რომელშიც გაერთიანდა არაერთი მეცნიერულ-ფანტასტიკური, სათავგადასავლო, გეოგრაფიული და სოციალურ-სატირული რომანი თუ მოთხრობა.

მწერალს მსოფლიო აღიარება მოუპოვეს რომანებმა: "მოგზაურობა დედამიწის ცენტრისაკენ" „მოგზაურობა დედამიწიდან მთვარემდე", „კაპიტან გრანტის შვილები", „მთვარის გარშემო", „80 000 კილომეტრი წყალქვეშ", „საიდუმლო კუნძული", „წლის კაპიტანი" და სხვა.

(მოამზადა ანა ნოდიამ)