თბილისის ზოოპარკს ახალი ბინადრები ჰყავს - მდედრი და მამრი სიამანგები. სიამანგი უკუდო, მეხეური, მუქი ბალნის მქონე გიბონია, რომელიც მალაიზიის, ტაილანდისა და სუმატრას ტყეებში ბინადრობს.
როგორც თბილისის ზოოპარკის „ფეისბუქის" გვერდის საშუალებით გახდა ცნობილი, სიამანგები გუშინ ჩამოფრინდნენ და ამჟამად ახალ გარემოსთან შეგუების პროცესში არიან. გულდასმით ამოწმებენ მათთვის მომზადებულ თოკებს, საქანელებსა და საძრომიალოებს.
„სიამანგებს ყელთან უცნაური „ტომარა" აქვთ მოთავსებული, რომლის საშუალებითაც ხმამაღალ ბგერებს გამოსცემენ და ასე ვთქვათ, „მღერიან". დაწყვილებული მდედრი და მამრი დუეტში ასრულებენ არიას. ამ შეძახილების დანიშნულება ბედნიერი წყვილის ადგილსამყოფელისა და სტატუსის გაცხადებაა", - ნათქვამია ზოოპარკის ადმინისტრაციის მიერ გავრცელებულ ინფორმაციაში.
(მოამზადა ლილუ მიროტაძემ)
