პოლიციის სისტემის დეპოლიტიზების მიზნით კანონში პოლიტიკური ნეიტრალობის დაცვის პრინციპი შედის, რომლის საფუძველზეც, პოლიციელს არ აქვს უფლება, თავისი სამსახურეობრივი მდგომარეობა რომელიმე პოლიტიკური სუბიექტის პარტიული ინტერესებისთვის გამოიყენოს. "ეს არის მკაფიო განაცხადი, რომ სისტემა იყოს დეპოლიტიზირებული და თითოეულმა პოლიციელმა თავისი უფლებამოსილება განახორციელოს მიუკერძოებლად და ყოველგვარი პარტიული ინტერესისგან დამოუკიდებლად", - აცხადებს შს მინისტრის მოადგილე ლევან იზორია. ლევან იზორიამ ადამიანის უფლებათა დაცვის საპარლამენტო კომიტეტის წევრებს "პოლიციის შესახებ" ახალი კანონპროექტი გააცნო. შინაგან საქმეთა სამინისტროს მიერ შექმნილი კანონპროექტი პარლამენტს გასულ კვირას წარედგინა.