,,რა თქმა უნდა, კურსის შეცვლას არ ვაპირებ“, – განაცხადა განათლებისა და მეცნიერების ახლადდანიშნულმა მინისტრმა, თამარ სანიკიძემ ჟურნალისტებთან საუბრისას. მისი თქმით, სამინისტროში რეფორმები მიყვანილია იმ კონდიციამდე, როცა მათი უშუალო განხორციელება მალე უნდა დაიწყოს. სანიკიძის ინფორმაციით, პირველკლასელებს წელსაც გადაეცემათ კომპიუტერები, ოღონდ განახლებული შინაარსით და ვერსიით. ,,ეს ნიშნავს იმას, რომ კომპიუტერები გამოყენებული იქნება ოპტიმალურად იმ დანიშნულებით, რა დანიშნულებითაც აქამდე უნდა ყოფილიყო გამოყენებული. ისინი ჩართული იქნება ქსელში და ვფიქრობ, ბევრი სასიამოვნო სიურპრიზი ელოდება ჩვენს ბავშვებს“, – აღნიშნა მან. განათლების მინისტრმა პროფესიულ სასწავლებლების მუშაობაზეც გაამახვილა ყურადღება. ,,პროფესიული სასწავლებლების შემთხვევაში აქცენტი არ კეთდება მხოლოდ იმაზე, რომ სწავლა იქნება უფასო. სწავლა იქნება ძალიან ხარისხიანი. ევროსაბჭოს, მსოფლიო ბანკის და სხვა დონორი ორგანიზაციების ექსპერტების ჩართულობით დამუშავდა ახალი პროგრამები“. ,,პროდუქტი, რომელსაც ვთავაზობთ, იქნება გაცილებით მაღალი ხარისხის და ხელმისაწვდომი,-განაცხადა თამარ სანიკიძემ. მისი თქმით, მოადგილეებთან დაკავშირებით ჯერ ჩამოყალიბებული პოზიცია არ აქვს, ამდენად, განათლების მინისტრის პირველი მოადგილის ვინაობა, ამ ეტაპზე გაურკვეველია.
