გასულ დღეებში ნინო ქათამაძის კონცერტების მოსკოვში გამართვას სოციალურ ქსელში მწვავე გამოხმაურება მოჰყვა. ამ ფაქტმა ბევრს გაახსენა, როგორ აკრიტიკებდნენ ანსამბლ „ერისონს“ მოსკოვში კონცერტის გამო. გაზეთ „კვირის პალიტრასთან“ ინტერვიუში „ერისიონის“ სამხატვრო ხელმძღვანელმა ჯემალ ჭკუასელმა განაცხადა, რომ ქართველებმა კონცერტი ყველგან უნდა გამართონ, სადაც კი საშუალება მიეცემა.
„ჩვენ ვუღალატეთ ჩვენს პროფესიას და ნინო ქათამაძემ არ უღალატა. სამწუხაროდ, ასე გამოვიდა. არ ვიყავით სწორი, მაგრამ „ხმა ღვთისა და ხმა ერისა“ ხანდახან შეგაწუხებს ადამიანს. მეორე კონცერტი იმიტომ აღარ გავმართეთ, რომ ამას ბევრი მიზეზი ახლდა. ერთ-ერთი მიზეზი ის არის, რომ ანსამბლი „ერისიონი“ რაღაც განსაკუთრებულია და „ყელში გაეჩხირათ“ ზოგ-ზოგიერთებს. ვაჟა-ფშაველას ნათქვამი ხომ გახსოვთ - „ცუდას რად უნდა მტერობა“. ვიღაცას ვაჯობეთ, ვიღაცას ყელში გავეჩხირეთ, ვიღაცამ ჩვენ გვაჯობა და რა ვიცი, რა.
ნინო ქათამაძეს მოსკოვში კონცერტი აუცილებლად უნდა გაემართა. თუმცა სასაცილოზე უარესი მიზეზია, როცა ამბობენ, „ერისიონი“ სახელმწიფო ანსამბლია და ჩვეულებრივი მომღერალი კი, როგორც უნდა, ისე მოიქცევაო. ანუ, ოღონდ სახელმწიფო ანსამბლში ნუ იქნებიან მოღალატეები და უბრალო მომღერალი თუ იქნება მოღალატე, ამას არა უშავს?! ეს ვერაფრით ამიხსნია. მე ძალიან დიდ პატივს ვცემ ნინო ქათამაძეს, ნიჭიერი ქალია და ძალიან კარგ საქმეს აკეთებს, თუნდაც მოსკოვში გამართული კონცერტებით.
სულ ვეუბნები ამ ხალხს დაფიქრდით ვის აყევით-მეთქი. შეხედონ სახელებს და გვარებს! იმათ საერთოდ ვერ უნდა გაბედონ ხმის ამოღება, მაგრამ რას ვიზამთ, დემოკრატიაა. თუ არ ვცდები, ჩინური გამოთქმაა, „თუ გსურს ადამიანს საშინელება ჩაადენინო, თავისუფლება უნდა მისცეო“, - აცხადებს ჯემალ ჭკუასელი.
(მოამზადა ლილუ მიროტაძემ)
