გაათავისუფლეთ და იპოვეთ "მოხეტიალე წიგნები" - ამ სახელწოდების კამპანია თბილისში მეორე დღეა მიმდინარეობს. "გამარჯობა! მე მოხეტიალე წიგნი ვარ, ჩემმა პატრონმა სამოგზაუროდ გამომიშვა, წამიკითხე და სადმე დამტოვე", - ამგვარი წარწერით წიგნები ნებისმიერ ადგილზე შეიძლება იპოვოთ.
მოხეტიალე წიგნების იდეის ერთ-ერთი ავტორი მწერალი ჯაბა ზარქუაა, მან სოციალურ ქსელ facebook-ზე გვერდი გააკეთა, რათა საკუთარი იდეა სხვებისთვის გაეზიარებინა. „ფეისბუქ" გვერდმა პოპულარობა მალევე მოიპოვა.
"იდეა წამოვიდა ძალიან მარტივად. ვფიქრობდი, როგორ მიმეტანა ჩემი წიგნები მკითხველამდე და უცებ ვთქვი, გავუშვებ ქალაქში და რატომაც არა, იყოს, იხეტიალოს, თვითონ იპოვოს მკითხველი. ძალიან გამიკვირდა, რომ ეს იდეა ასე ოპერატიულად და დიდი მონდომებით აიტაცა ხალხმა. ახლა ვნახოთ, პირველი შედეგები როგორი იქნება, ჯერ ვინც იპოვა, ისეთები არ არიან, სანამ ბევრ წიგნს არ დავტოვებთ, მანამდე ცოტა გაჭირდება პოვნა, დაველოდოთ", - ამბობს ჯაბა ზარქუა.
არსებობს ორი პირობა მათთვის, ვინც მოხეტიალე წიგნს იპოვის, მათ წიგნი აუცილებლად უნდა წაიკითხონ, შემდეგ კი სხვა ადგილზე დატოვონ, სადაც წიგნი ახალ მკითხველს დაელოდება.
კამპანიის ფარგლებში ნებისმიერ მსურველს აქვს შესაძლებლობა დატოვოს წიგნი ქუჩაში, კაფეში, ტრანსპორტში და სხვა ნებისმიერ ადგილზე. მოხეტიალე წიგნების facebook-გვერდზე გათავისუფლებული წიგნების სია მატულობს. მკითხველები საკუთარი თაროებიდან წიგნებს ათავისუფლებენ და თბილისის, ბათუმის, ქუთაისის, გორის, ფოთის ქუჩებში სახეტიალოდ უშვებენ.
(მოამზადა ანა ნოდიამ)
