პოეტის უცნობ ლექსებს მკითხველი დღეს ეზიარება. ბესიკ ხარანაულის ახალი წიგნის პრეზენტაცია ხელოვნების კაფე „ამო რამე"- ში 20 საათზე გაიმართება. „ლექსები 2003-2013" გამომცემლობა ინტელექტის მიერ გამოიცა და ავტორის 10 წლის განმავლობაში დაწერილ ლექსებს აერთიანებს. ბესიკ ხარანაული ორი პროზაული ნაწარმოებისა და ოცამდე პოეტური კრებულის ავტორია.
„ვფიქრობ, ეს კრებული განსხვავებულია ჩემი სხვა პოეტური კრებულებისაგან. ეს სასინჯო ლექსებია. ბევრ ლექსს ჩემთვის ვმღერი. იმას კი არ ვამბობ, რომ ამით სიმღერებს ვქმნი, მაგრამ ხომ ვერავინ დამიშლის, რომ ჩემთვის ვიმღერო", - ამბობს პოეტი.
სრულიად საქართველოს კათოლიკოს-პატრიარქმა, ილია მეორემ, ცოტა ხნის წინ კომპოზიტორი გია ყანჩელი, რეჟისორი თემურ ჩხეიძე და პოეტი ბესიკ ხარანაული წმინდა გიორგის ოქროს ორდენებით დააჯილდოვა. ბესიკ ხარანაულმა საქართველოს ეკლესიის უმაღლესი ჯილდო, ქართული მწერლობის განვითარებაში შეტანილი განსაკუთრებული წვლილისთვის მიიღო.
