10-11 აპრილს ალმა-ატაში (ყაზახეთი) გაიმართა საერთაშორისო კონფერენცია რისკ-მენეჯმენტში, სადაც მონაწილეობდა 300-ზე მეტი დელეგატი რუსეთიდან, აშშ-დან, ინდოეთიდან, სამხრეთ კორეიდან და სხვა ქვეყნებიდან. კონფერენციაზე განიხილეს უკრაინის კრიზისის გავლენა სხვა ქვეყნებზე. თუმცა ყველაზე საინტერესო ის იყო, რომ ორგანიზატორებმა მოაწყვეს „სპირიტიული კიბერ-კავშირი" ვლადიმერ ლენინთან!- იუწყება Tengrinews- ი.

სეანსი ჩატარდა „საინფორმაციო მატრიცის" მეშვეობით. სეანსის ორგანიზატორი გრიგორი კულაგინი ამას ასე ხსნის: „იმიერ სამყაროში გადასულები კიბერნეტიკულ სივრცეში ტოვებენ გარკვეულ მატრიცას, ეს არის ადამიანის სახე, მისი ინფორმაციის და აზრების საცავი. სწორედ ამ მატრიცის მეშვეობით შესაძლებელია თანამედროვე მოვლენებზე  პროექცის მოწყობა და იმის გაგება რას იტყოდა ესა თუ ის ადამიანი დღეს."

კონფერენციის მონაწილეები დაინტერესდნენ ბოლშევიკების ბელადის აზრებით დღეს მიმდინარე მოვლენებზე.  კიბერსეანსისას ლენინმა იწინასწარმეტყველა ევროკავშირის დაშლა და აზიის ქვეყნების საზღვრების ზრდა. თურმე აღფრთოვანებულია რუსეთის პრეზიდენტის პუტინის პოლიტიკით; მაგრამ სასტიკად არ მოსწონს ერთსქესიანთა ქორწინების იდეა. მისი აზრით ქორწინებამ უნდა შვას ბავშვები, რომლებიც შემდეგ ფაბრიკა-ქარხნებში იმუშავებენ.

კონფერენციის მსვლელობისას ანალოგიური სეანსი ჩაუტარებიათ ჯონ ლენონთან, თუმცა მისი აზრები არ გაუსაჯაროებიათ. ეტყობა რუსეთისა და მისი პრეზიდენტის პოლიტიკით მაინცდამიანც აღფრთოვანებული არ არის.

(მოამზადა თამაზ ჩიქვანაიამ)