გორის რაიონის სოფელ ზედა აძვში მდებარე წმინდა გიორგის სახელობის ეკლესია ატენის მიტროპოლიტმა ანდრიამ მოინახულა. აღსანიშნავია, რომ ეკლესია ოკუპირებულ ტერიტორიაზეა მოქცეული.

მას შემდეგ, რაც ე.წ საზღვრის აღმნიშვნელი აბრა დაიდგა, მოსახლეობა ეკლესიაში მისვლას ვეღარ ახერხებს. აკრძალვების მიუხედავად, მიტროპოლიტმა ეკლესია მაინც მოინახულა და მთავრობას მოუწოდა ამ პრობლემას ყურადღება მიაქციოს, რათა მომლოცველებმა თავისუფლად შეძლონ ეკლესიაში სიარული.

„საქართველოს საპატრიარქო წუხს იმის გამო, რაც ხდება, რადგან როდესაც ქართული მიწის ნებისმიერ გოჯს ვიღაც ასეთი ხერხით ითვისებს, ეს არის ტკივილი“-განაცხადა მიტროპოლიტმა ანდრიამ.