რეჟისორი ლევან კოღუაშვილი გერმანიის ქალაქ ვისბადეში ჩატარებულ ყოველწლიურ კინოსფესტივალზე ფილმისთვის „შემთხვევითი პაემნები“ საუკეთესო რეჟისორად დასახელდა.
ფილმი 40 წლის მარტოხელა მამაკაცის სევდიან ყოფას ასახავს, რომელიც რეჟისორმა რეალური ცხოვრებიდან აიღო. „შემთხვევითი პაემნების“ მთავარ გმირს, მისი მშობლები კარნახობენ, თუ როგორც იცხოვროს და რა აკეთოს. ფილმში მთავარ როლებს ანდრო საყვარელიძე, ია სუხიტაშვილი, არჩილ ქიქოძე, კახი კავსაძე და მარინა ქარცივაძე ასრულებენ.
როგორც თავად რეჟისორმა განაცხადა, ფილმის სცენარი მისი ყოფილი პედაგოგის მიერ მოთხრობილი ისტორიის მიხედვით დაწერა.
„ ჩემი ყოფილი პედაგოგი ბორის ფრუმინია, რომელიც ამერიკაში მცხოვრები რუსი ემიგრანტია. სწორედ მან მიამბო დედა როგორ ურჩევდა ცოლი მოეყვანა და რა სასაცილო გაგრძელება მოჰყვა ამ ისტორიას. ვფიქრობ, ეს ჩვენი საზოგადოებისთვის მნიშვნელოვანი თემაა, რადგან ზრდასრული მამაკაცები ხშირად ისევ მშობლებთან ცხოვრობენ, მათ კისერზე არიან ჩამოკიდებლნი და დამოუკიდებლად გადაწყვეტილებას ვერ იღებენ“-განაცხდა ლევან კოღუაშვილმა.
მისი თქმით, ფილმი სევდიანი კომედიაა, რომელშიც უფრო მსუბუქი ნოტები სჭარბობს, ვიდრე დრამატული.
