ყოფილი დეპუტატი, ორგანიზაცია "სამეგრელოს ხმის" დამფუძნებელი თენგიზ ჯგუშია მისი და გამგებლის მოადგილის მოვალეობის შემსრულებლის, მერაბ ქვარაიას შორის დაპირისპირების დეტალებზე საუბრობს.
დღეს გამართულ პრესკონფერენციაზე თენგიზ ჯგუშიამ განაცხადა, რომ შექმნილ შემთხვევაში საუკეთესო გამოსავალი გამაფრთხილებელი გასროლის გაკეთება იყო, რის შემდეგაც სიტუაცია შეძლებისდაგვარად განიმუხტა.
თენგიზ ჯგუშია თავს უდანაშაულოდ მიიჩნევს. მან მადლობა გადაუხადა სასამართლოს ობიქტური გადაწყვეტილებისთვის.
ჯგუშიამ ვიცე-სპიკერ მანანა კობახიძის განცხადებასაც უპასუხა. მისი თქმით, ერთ-ერთ ტელეკომპანიაში კობახიძემ იმაზე ისაუბრა, რომ თენგიზ ჯგუშია "ქართულ ოცნებაში" გაწევრიანებას და "ქართული ოცნების" ზუგდიდის ორგანიზაციის ხელმძღვანელად დანიშვნას სთხოვდა. თენგიზ ჯგუშიამ ეს ფაქტი უარყო, თუმცა კობახიძესთან შეხვედრის ფაქტი დაადასტურა. ჯგუშია აცხადებს, რომ მას არავისთვის უთხოვია ზუგდიდში კოალიცია "ქართული ოცნების" ხელმძღვანელი ყოფილიყო.
შეგახსენებთ, რომ თენგიზ ჯგუშია მერაბ ქვარაიასთან მომხდარი დაპირისპირების გამო რამდენიმე დღის წინ დააკავეს, გუშინ კი სასამართლომ გირაოს სანაცვლოდ გაათავისუფლა.
