ტურიზმის ეროვნული ადმინისტრაციის ინფორმაციით, ზაფხულში საქართველოში უკრაინელი ტურისტების ბუმი იქნება. ამის მიზეზად უწყებაში მაისის თვიდან უკრაინაში უპრეცედენტოდ მასშტაბური მარკეტინგული კამპანიის დაწყებას ასახელებენ. ტურიზმის ადმინისტრაციის განცხადებით, ექსპერტები პროგნოზირებენ, რომ ყირიმში შექმნილი ვითარების გამო იქ დამსვენებელი ტურისტების ნაკადი შავი ზღვის სხვა კურორტებზე, მათ შორის საქართველოს ზღვისპირა კურორტებზე გააკეთებს არჩევანს.
უწყებაში აცხადებენ, რომ აქტიურად იმუშავებენ გამოთავისუფლებული სეგმენტის საქართველოში მოზიდვაზე.
„ყირიმს ყოველწლიურად 4 მილიონი შიდა ტურისტი სტუმრობდა და ადმინისტრაცია ყველაფერს გააკეთებს იმისთვის, რომ უკრაინელი ტურისტების მნიშვნელოვანი ნაწილი საქართველოში მოიზიდოს. მოლაპარაკებები ავიაკომპანიებთან უკრაინის მიმართულებით რეისიების გაზრდის თაობაზე უახლოეს დღეებში დასრულდება. შემუშავებულია უკრაინის ბაზარზე საწარმოებელი აქტიური სარეკლამო კამპანია, რომლის ფარგლებშიც განხორციელდება სატელევიზიო და გარე რეკლამა, ღონისძიებები და გაცნობითი ტურები. მომზადდება გადაცემები, საქართველოს ტურისტული პოტენციალის შესახებ უკრაინის ცენტრალურ არხებზე, ასევე სახალისო გათამაშებები", - აცხადებენ უწყებაში.
ადმინისტრაციის ხელმძღვანელ გიორგი სიგუას განცხადებით, საქართველოს შავიზღვისპირა სანაპირო ბევრად აღემატება ყირიმის ტურისტულ ინფრასტრუქტურას.
უწყების ინფორმაციით, უახლოეს დღეებში გიორგი სიგუა პრესკონფერენციას გამართავს უკრაინაში დაგეგმილ კამპანიასთან და უკრაინულ ტურისტულ ბაზარზე გამოთავისუფლებული სეგმენტის მოზიდავასთან დაკავშირებით.
