ავსტრიის დაბა ხინტერშტოდერში უნიკალური ინციდენტი მოხდა. დამლაგებლის ფუნქციის მქონე რობოტმა თავი მოიკლა. ადგილობრივი მედიის ცნობით, სანამ მეპატრონეები სახლში არ იმყოფებოდნენ, რობოტმა თავი ელექტროღუმელზე დაიწვა.

სუიციდამდე რობოტის მფლობელმა, 44 წლის ჰელმუტ კნივასსერმა საკუთარ ელექტრონულ დამხმარეს მაგიდიდან დაფანტული ბურღულეულის ალაგების  დავალება მისცა. როცა კიბერდამლაგებელმა დავალება შეასრულა, პატრონმა რობოტი გამორთო და ოჯახთან ერთად სასეირნოდ წავიდა. მისი ვერსიით, სახლში არყოფნის პერიოდში მოწყობილობა თავისით ჩაირთო, ელექტრონულ ღუმელზე აძვრა, ქვაბი გასწია, ღუმელის ჩამრთველი გადაწია და თავი დაიწვა, პარალელურად კი სახლში ხანძარი გააჩინა.

დაზარალებულისგან განსხვავებული ვერსია აქვთ ადგილობრივ მეხანძრეებს. მათი ვარაუდით, სახლის მეპატრონეს ღუმელის გათიშვა თავად დაავიწყდა. ავსტრიელი ჟურნალისტები ხუმრობენ, რომ „კიბერდამლაგებელმა მონოტონურ და დამღლელ სამუშაოს ვერ გაუძლო".

„როგორც ჩანს, მისი ინტელექტი ხელოვნური არ ყოფილა", - წერენ ადგილობრივ მედიაში.

თავის მხრივ, კნივასსერი აპირებს, უჩივლოს კომპანიას, რომელმაც მას სუიციდისკენ მიდრეკილი რობოტი მიჰყიდა.