რუსთავში "მარშუტკის" მძღოლების აქცია მიმდინარეობს. რუსთავი-თბილისის სამარშრუტო ხაზების მძღოლებმა და მათი ოჯახის წევრებმა "ქართული ოცნების" რუსთავის ოფისის მიმდებარე ტერიტორიიდან რუსთავის მერიასთან გადაინაცვლეს. აქციის მონაწილეები გუშინ ერთ-ერთი მძღოლის გარდაცვალების გამო პასუხისმგებლობას ხელისუფლებას აკისრებენ და რუსთავი-თბილისის სამარშრუტო ხაზზე ჩატარებული კონკურსის შედეგის გაუქმებას მოითხოვენ.
საპროტესტო აქციას ლეიბორისტული პარტიის ლიდერი შალვა ნათელაშვილი შეუერთდა, თუმცა მოედანზე მის გამოჩენას მძღოლების მხრიდან პროტესტი და სიტყვიერი შელაპარაკება მოჰყვა. ნათელაშვილს ერთ-ერთმა მძღოლმა ტერიტორიის დატოვება მოსთხოვა.
ლეიბორისტული პარტიის ლიდერის განცხადებით, ვეფხია გოგილაშვილის გარდაცვალებაზე პასუხისმგებლობა ივანიშვილსა და კალაძეს ეკისრება. ორშაბთს ის იტალიის საელჩოს მიმართავს და მოუწოდებს, იტალიის ბანკებში ყველა ანგარიში გაყინონ, რომელიც კახა კალაძეს აქვს.
,,ორშაბათს იტალიის საელჩოს მივმართავ და მოვითხოვ გაიყინოს კალაძის ყველა ანგარიში, რომელზეც გაყიდული მატჩებიდან და ნარკოდანაშაულიდან შესული ფული აქვს იტალიაში დაგროვილი," - განაცხადა შალვა ნათელაშვილმა.
