რუსთავის მერიის წინ მძღოლებისა და მათი ოჯახის წევრების საპროტესტო აქცია დროებით შეწყდა. აქციის მონაწილეების განცხადებით, მძღოლები პროტესტს ხვალ დილიდან განაახლებენ.
ცოტა ხნის წინ განცხადება გააკეთა ,,გაერთიანებული ოპოზიციის" რუსთავის მერობის კანდიდატმა კობა ძლიერიშვილმა, რომელმაც პოლიტიკურ პარტიებს მოუწოდა, შეწყვიტონ რუსთაველი მძღოლის გარდაცვალების ფაქტის პირადი პოლიტიკური ინტერესებისთვის გამოყენება.
,,პოლიტიკური განცხადების გაკეთებისგან თავს შევიკავებ, რადგან სანამ არ დასრულდება გამოძიება და არ დაიდება დასკვნა, ამ თემით მანიპულირებას აზრი არ აქვს. რაც შეეხება მძღოლების საპროტესტო აქციებს, მე ვფიქრობ, რომ თავის დროზე, უფრო გამჭვირვალე უნდა ყოფილიყო საკონკურსო პირობებზე მუშაობის პროცესი და ზოგადად ამ თემის განხილვა, რაც შემდგომში აღარ გამოიწვევდა ასეთ საპროტესტო გამოსვლებს," - განაცხადა კობა ძლიერიშვილმა.
რუსთავში, მძღოლების საპროტესტო აქცია მთელი დღის განმავლობაში იმართებოდა. აქციის მონაწილეებმა ქალაქის შესასვლელიდან ფეხით მსვლელობა მოაწყვეს და ,,ქართული ოცნების" რუსთავის ორგანიზაციის ოფისთან და ქალაქის მერიასთან აქციები გამართეს.
