კომპანია NIKE-მა ახალი ბუცის Mercurial Superfly წარადგინა, რომელიც რევოლუციური უნდა გახდეს სიჩქარის თვალსაზრისით.
ახალი ბუცები მადრიდის „რეალის" ფორვარდმა კრიშტიანუ რონალდუმ წარადგინა. სწორედ მსგავსი ბუცებით იასპარეზებს პორტუგალიელი ბრაზილიაში გასამართ მსოფლიო ჩემპიონატზე.
„დიზაინის თვალსაზრისით, უკანასკნელი ინოვაციების გამოყენებით, ახალი Mercurial Superfly ამსხვრევს ყველანაირ სტერეოტიპს იმაზე, თუ როგორ უნდა გამოიყურებოდეს თანამედროვე ბუცი და რამდენად უნდა ეხმარებოდეს იგი ფეხბურთელს მოედანზე" - განაცხადა Nike-ის პრეზიდენტმა მარკ პარკერმა.
რაც შეეხება თავად რონალდუს, სამეფო კლუბის რიგებში მან „ვალენსიას" წინააღმდეგ მატჩში, ლა-ლიგის მიმდინარე სეზონში, 31-ე გოლი გაიტანა. ეს მისთვის სეზონის განმავლობაში, მადრიდელთა მაისურით გატანილ 50-ე გოლად იქცა.
აღსანიშნავია, რომ მსგავს შედეგს რონალდუ უკვე მეოთხე წელია აღწევს: 2010/2011 სეზონში პორტუგალიელმა 54 გოლი, 2011/2012 - 60, გასულ სეზონში კი - 55 გოლი გაიტანა.
