კასპის რაიონის სოფელ სასირეთში კახიშვილების 8 სულიანი ოჯახის საცხოვრებელი სახლი სავალალო მდგომარეობაშია. წვიმის დროს დაზიანებული ჭერიდან წყალი და ქვიშა ჩადის. ბავშვების დედა ირინა კახიშვილი ადგილობრივ ხელისუფლებას ვაგონის გამოყოფას სთხოვს.
ირინა კახიშვილმა, წერილობითი განცხადებებით, წლების წინ ცენტრალურ მთავრობასაც მიმართა. „თუ გავიმარჯვებთ, დაგეხმარებითო", - ასე უპასუხა რაიონის მაშინდელმა გამგებლის მოადგილემ ნუგზარ ნონიაშვილმა. კახიშვილებმა დახმარებისთვის მაშინდელ პრეზიდენტს მიხეილ სააკაშვილსაც მიმართეს, რომლის ადმინისტრაციამ განცხადება განსახილველად მუნიციპალიტეტს გადაუგზავნა.
შიდა ქართლის საინფორმაციო ცენტრის ინფორმაციით, რაიონის ამჟამინდელმა ხელმძღვანელმა გოჩა გოჩიტაშვილმა კახიშვილებს აცნობა, რომ ამ ეტაპზე საცხოვრებელი სახლის გაუმჯობესებისთვის ადგილობრივ ბიუჯეტში თანხები არ არის. მუნიციპალიტეტს შეუძლია ოჯახს ბინის ქირის თანხა დროებით გადაუხადოს.
