დღეს 20:00 საათზე საქართველოს კულტურისა და ძეგლთა დაცვის სამინისტროს მხარდაჭერით, კოტე მარჯანიშვილის სახელობის სახელმწიფო დრამატულ თეატრში საქართველოს სახალხო არტისტს, მრავალი პრემიის ლაურეატს, მსახიობ ოთარ მეღვინეთუხუცესს გაიხსენებენ. როგორც „რეპორტიორს" კულტურისა და ძეგლთა დაცვის სამინისტროდან აცნობეს, ღონისძიებას კულტურისა და ძეგლთა დაცვის მინისტრის მოადგილე მანანა ბერიკაშვილი დაესწრება.
ოთარ მეღვინეთუხუცესი 2013 წლის 9 მაისს, მძიმე ავადმყოფობის შემდეგ, 81 წლის ასაკში გარდაიცვალა. მსახიობმა პროფესიული მოღვაწეობის ექვსი ათეული წლის განმავლობაში არაერთი მნიშვნელოვანი როლი შეასრულა კინოსა თუ თეატრში, თუმცა საერთაშორისო მასშტაბის აღიარება მას ჭაბუა ამირეჯიბის „დათა თუთაშხიას" რეჟისორ გიგა ლორთქიფანიძისეულმა ეკრანიზაციამ მოუტანა.
