ქობულეთი წლევანდელ საკურორტო სეზონს განახლებული იერ-სახით შეხვდება. ქალაქის თითქმის ყველა უბანში სარეაბილიტაციო და მოსამზადებელი სამუშაოები მიმდინარეობს. მუნიციპალიტეტის 2014 წლის ბიუჯეტის პრიორიტეტი სწორედ ინფრასტრუქტურული სამუშაოების ჩატარებაა, რომლის ფარგლებში ქალაქის ცენტრში ახალი კულტურის სახლის მშენებლობა დაიწყო. რუსთაველის ქუჩაზე ეწყობა ტროტუარები და იგება ფილები. პარალელურად ხდება წყალსადენ-კანალიზაციის სისტემების მონტაჟიც, ხოლო ზღვის სანაპიროზე - ზღვისპირა პარკიდან სასტუმრო „კოლხეთამდე" - ახლადგაკეთებული ჯებირის წინ იგება დეკორატიული ფილები და მალე ეს ტერიტორია ტრადიციულად ერთ ერთი საუკეთესო დასასვენებელი ადგილი იქნება ქობულეთში.
როგორც მუნიციპალიტეტის გამგეობის შესაბამისი სამსახურები აცხადებენ, მიმდინარე სამუშაოთა უმეტესი ნაწილი ტურისტული სეზონის დაწყებამდე დასრულდება და ქალაქი დამსვენებლის მისაღებად მზად იქნება.
