ბათუმის ნავსადგურში ამერიკის სამხედრო-საზღვაო ძალების კუთვნილი ხომალდი „ტეილორი“ შემოვიდა. დახვედრის საზეიმო ცერემონიალს საქართველოში ამერიკის შეერთებული შტატების ელჩი რიჩარდ ნორლანდი ესწრებოდა. ვიზიტი ორმხრივი თანამშრომლობის ფარგლებში ერთი თვის წინ დაიგეგმა. ხომალდი სამ დღეს დარჩება. ვიზიტის ფარგლებში, გაიმართება ერთობლივი სამხედრო წვრთნები და ასევე შეხვედრები ხელისუფლების წარმომადგენლებთან.

„ტეილორი“ შეერთებული შტატების სამხედრო საზღვაო ძალებისთვის აგებული რიგით მე-40 ფრეგატია. იგი 35 წლისაა. მისი ეკიპაჟი 200 სამხედრო მოსამსახურისგან შედგება. ხომალდი გამანადგურებელია და შეუძლია როგორც წყალქვეშა გემების განადგურება, ასევე საჰაერო კონტროლი.