Corriere Di Bologna-ს ინფორმაციით, იტალიური "მონტეპასკის" 17 ყოფილი მოთამაშე, მათ შორის საქართველოს საკალათბურთო ნაკრების ფორვარდი ვიქტორ სანიკიძე, გადასახადების დამალვაშია ეჭვმიტანილი.

იტალიური გამოცემის ცნობით, ფიგურანტთა სიაში სანიკიძესთან ერთად მოხვდნენ: კშიშტოფ ლავრინოვიჩი, რიმანტას კაუკენასი, შონ სტონრუკი, რომეინ სატო, ბენ ეზე, ბო მაკალები, ჰენრი დომერკანტი, ნიკოს ზისისი, ვლადი იულიევსკი, ბუტსი ტორნტონი, დევიდ მოსი, მალიკ ჰეირსტონი, დავიდ ანდერსენი, დევიდ ჰოუკინსი, მილოვან რაკოვიჩი და იგორ რაკოჩევიჩი.

კალათბურთელები დაკავშირებულნი არიან "მონტეპასკის" ექს-პრეზიდენტის ფერდინანდო მინუჩის საქმესთან, რომელიც ახლახან დააკავეს.

არსებობს ეჭვი, რომ მინუჩიმ სახელმწიფოს 16 მლნ ევრო დაუმალა, რომელიც მოთამაშეთა კონტრაქტებისა და ხელფასებიდან ბიუჯეტში გადასახადის სახით უნდა შეეტანა. საუბარია სიენური კლუბისთვის "ოქროს ხანაზე", როდესაც "მონტეპასკი" იტალიის ჩემპიონი ზედიზედ ხდებოდა (2007-2013) და ევროლიგის "ოთხთა ფინალში" თამაშობდა.

იტალიურმა პოლიციამ უკვე დაიწყო საქმის მონაწილეთა სატელეფონო საუბრებისა და ელექტრონული მიმოწერის გაშიფვრა.

ვიქტორ სანიკიძე სიენის "მონტეპასკის" ღირსებას 2012-13 წლებში იცავდა, საიდანაც ესპანურ "სარაგოსაში" გადაბარგდა და დღემდე ამ გუნდის ღირსებას იცავს.