11 მაისს, ესპანეთის ჩემპიონატის 37-ე ტურის მატჩები გაიმართა. პრიმერადივიზიონის 2013/2014 წლების სეზონის უკანასკნელი ტურის წინ, ჩემპიონის ვინაობა კვლავ უცნობია.

პირველადგილოსანმა მადრიდის „ატლეტიკომ“ (89 ქულით) „მალაგას“ უმასპინძლა. შეხვედრაში ანგარიში სტუმრებმა სამუელ გარსიას (66’) გოლის წყალობით გახსნეს. 74-ე წუთზე, ტობი ალდერვეირელდმა წონასწორობა აღადგინა. მიუხედავად არაერთი მცდელობისა, მასპინძლებმა მეტოქის კარის აღება ვეღარ მოახერხეს და ფრეს დასჯერდნენ - 1:1.

ამ მატჩში 3 ქულის მოპოვების შემთხვევაში, „ატლეტიკო“ ჩემპიონობას იზეიმებდა, ახლა კი, უკანასკნელ ტურში მეორეადგილოსან „ბარსელონასთან“ (86 ქულით) მოუწევს ტიტულისთვის ბრძოლა, რომელმაც უკანასკნელ ტურში „ელჩესთან“ გასვლით მატჩში 1 ქულა მოიპოვა - 0:0.