რეჟისორი ქეთი დოლიძე ორუელის სპექტაკლ „ცხოველების ფერმის“ ედინბურგის ფესტივალზე წარდგენას აპირებს. თუმცა როგორც რეჟისორმა „რეპორტიორთან“ განაცხადა, კულტურის სამინისტრო მხარდაჭერას აგვიანებს:

„რეჟისორი გაი მასტერსონი ორუელის „ცხოველების ფერმის“ დასადგმელად მოვიწვიეთ. იმისთვის რომ კინომსახიობთა თეატრის რეპერტუარში „ცხოველების ფერმა“ ყოფილიყო, უცხოელი რეჟისორის მოწვევა ნამდვილად არ დამჭირდებოდა, ქართველსაც დავაკავებდი. ეს საჭირო გახდა, იმიტომ, რომ მაკინტოშის კომპანიას ორუელის ოჯახთან ხუთი წლით აქვს შეთანხმება დადებული, რომ „ცხოველების ფერმის“ დადგმის უფლება მაკინტოშის გარდა არავის აქვს. ჩვენ მოვიპოვეთ უფლება, რომ „ცხოველების ფერმა“ დადგას ბრიტანელმა და მათმა საყვარელმა რეჟისორმა გაი მასტერსონმა, იმისთვის, რომ შემდეგ სპექტაკლი ედინბურგის ფესტივალზე წავიდეს. ძალიან  დიდი პროექტია, რომელშიც კულტურის სამინისტრო  ჩავრთე. ახლა უცბად აღმოჩნდა, რომ სპექტაკლის დასადგმელი ფული არის, მაგრამ წასასვლელი- არა. ეს არ შეიძლება! სამმაგად ტყუვდებიან-ორუელის ოჯახი, რომლებმაც მთლიანად მოგვცეს საავტორო უფლება, გაი მასტერსონი და დარბაზი, რომელიც ერთი თვის მანძილზე  გაცდება და ამას არავინ გვაპატიებს. ჩვენ უკვე ვზივართ პროგრამაში და  ბილეთების გაყიდვა დაიწყო. მსოფლიოში უკვე ყველგან, სიტყვიერი თანხმობა იმის საწინდარია, რომ რაღაც უნდა გაკეთდეს. დიდი კომპანიებიც კი ხანდახან ტელეფონით ელაპარაკებიან და საქმეებს ასე წყვეტენ. ამიტომ არ შეიძლება იმის თქმა, რომ თანხმობა ოფიციალურად არ მოუციათ.  შესაბამისად, ვცდილობთ კულტურის სამინისტრო დავარწმუნოთ.“

ქეთი დოლიძე ამავდროულად თეატრალური ფესტივალის, GIFT-ის  („საჩუქარი“) გასამართად ემზადება, რომელიც ოქტომბერში ჩატარდება.