უელსის ნაკრების თავდამსხმელმა გარეტ ბეილმა კრიშტიანუ რონალდუსთან ურთიერთობაზე ისაუბრა, ასევე შეაფასა „რეალის" მაისურით მისი პირველი სეზონი.
შეგახსენებთ, რომ ბეილი რეალში გასული წლის ზაფხულში გადავიდა. გავრცელებული ხმებით, მის სანაცვლოდ მადრიდელებმა 100 მილიონი ევრო გადაიხადეს, რაც რეკორდული სატრანსფერო ღირებულებაა.
ამხელა თანხამ გარკვეული კრიტიკა გამოიწვია მისი მისამართით, თუმცა გარეტმა დაამტკიცა, რომ კრიშტიანუსთან ერთად შეუძლია გახდეს კლუბის ერთ-ერთი ლიდერი. უელსელის ანგარიშზე მიმდინარე სეზონში 42 ჩატარებული მატჩი, 20 გატანილი გოლი და 19 საგოლე გადაცემაა.
„ვფიქრობ, რომ პირველი ნაბიჯი, რომელიც მადრიდში გადავდგი, კარგი იყო. რონალდუ ძალიან დამეხმარა, რათა დროულად გამეარა ადაპტაცია და დავხმარებოდი გუნდს. კრიშტიანუ კარგი ბიჭია, რომელიც მუდამ ეძებს საუკეთესო გზებს გუნდისთვის. ის დიადი ფეხბურთელია, რომელთან ერთად თამაშიც სიამოვნებაა", - განაცხადა ბეილმა.
შეგახსენებთ, რომ „რეალი" ჩემპიონთა ლიგის ფინალში გავიდა, სადაც თავის თანაქალაქელ „ატლეტიკოს" დაუპირისპირდება. ასე რომ, ბეილს კარგი შანსი აქვს ევროპის ყველაზე პრესტიჟული საკლუბო ტურნირის გამარჯვებული გახდეს.
