18 მაისს, 19:00 საათზე, საქართველოს ხელოვნების სასახლეში  ახლად რესტავრირებული რვა საგამოფენო და ისტორიული დარბაზი გაიხსნება. რეაბილიტაციის პროექტი საქართველოს კულტურისა და ძეგლთა დაცვის სამინისტროსა და ამერიკის შეერთებული შტატების საელჩოს მხარდაჭერით განხორციელდა.

რეაბილიტაციის პერიოდში სასახლის კედლებზე აღმოჩნდა უძველესი მხატვრობის ფრაგმენტები, რომლის მეშვეობითაც მხატვარ-რესტავრატორებმა საგამოფენო დარბაზებს პირვანდელი სახე დაუბრუნეს.

აღდგენილია დავით არსენიშვილის, რევაზ ლაღიძის, ჯორჯ ბალანჩინის, ქართული თეატრისა და სვეტებიანი დარბაზები. დამთვალიერებელს ასევე, ელოდება კოლხი მედეასა და ოქროს ვერძის ოთახები.

სასახლის სვეტებიან და თეატრის საგამოფენო სივრცეში განთავსდება მუზეუმის ფონდებში დაცული თეატრის უნიკალური ისტორიის ამსახველი ექსპონატები: კოსტიუმები, მემორიალური ნივთები, პარტიტურები, ხელნაწერები, აფიშები, ფოტოები, ასევე, ცნობილი ქართველი მხატვრების - პ. ოცხელის, გ. გაბაშვილის, ს. ქობულაძის, ელ. ახვლედიანის, ი. გამრეკელის, კ. ზდანევიჩისა და სხვათა გრაფიკული და ფერწერული ტილოები.

რევაზ ლაღიძის საგამოფენო დარბაზში, სხვა ექსპონატებთან ერთად, იხილავთ მის მემორიალურ როიალს, რომელზეც შეიქმნა უკვდავი ქართული სიმღერა ,,თბილისო".

სასახლის პირველ სართულზე, ჯორჯ ბალანჩინის დარბაზში, თბილისის ზ. ფალიაშვილის სახელობის ოპერისა და ბალეტის სახელმწიფო აკადემიური თეატრის მხარდაჭერით გაიმართება "ნიუ-იორკ სითი ბალეს'" ფოტოგრაფის, პაულ კოლნიკის ნამუშევრების პრეზენტაცია, რომელიც ბალანჩინის ცხოვრებასა და შემოქმედებით მოღვაწეობას ეძღვნება.

18 მაისს, მუზეუმების საერთაშორისო დღეს, ხელოვნების სასახლე 22-კარატიანი ოქროთი დაფერილ კარს ფართოდ გაუღებს საპატიოდ მოწვეულ სტუმრებს.