„ვისაც გწამთ ჩვენი და გჯერათ!!!“ - გაზეთი „ალია“ აქვეყნებს მიმართვას და მოუწოდებს ყველას თანადგომისა და მხარდაჭერისკენ:

„წლებია, „ალია“-„ქრონიკას“ უამრავი ფსიქოლოგიური, მორალური, ფიზიკური ზეწოლისა თუ ფინანსური მარწუხებისა და წნეხის ქვეშაც კი არ გადაუხვევია მთავარი პრინციპისთვის – არასოდეს უთქვამს თეთრზე, შავიაო! ამიტომაც დაგვსაჯეს და ჩვენი პრინციპულობა, სიმართლე 53500 ლარი დაგვისვეს („ფრესკოს“ „აყროლებული ქათმის“ სტატია კი 6500 ლარად შეგვიფასეს)! გაზეთისთვისაა ეს დიდძალი თანხა, თორემ ზოგიერთისთვის ერთი თვის პრემიაა. სამართლებრივად, პროტესტის სხვა ყველანაირი ფორმის გამოხატვითაც კი, აყროლებული ქათმებითაც რომ გავავსოთ დაბრმავებული ქართული სამართალი, ან კუბლაშვილი თავის მოსამართლეებიანად (თეა სოხაშვილი-ნიკოლაიშვილი, მაია ბაქრაძე, ვანო წიკლაური, თამაზ ურთმელიძე) – განაჩენი არ შეიცვლება, საბოლოოა და თანაც უტიფრად თავხედური – გასაჩივრებას აღარ ექვემდებარებაო. რადგან სიმართლის თქმისთვის ფულს გვთხოვენ, იძულებული ვხდებით, ქართულ ისტორიაში გაზეთისთვის უპრეცედენტო ჯარიმის გადასახდელად „თიბისი ბანკში“ სპეციალური ანგარიში გავხსნათ:

GE30TB7568636020100001

ყველას, ყველას, ყველას, ვისაც გწამთ ჩვენი და გჯერათ, რომ ორ ათწლეულზე მეტია, „ალია“-„ქრონიკას“ სიმართლე ტყუილად არ უწერია, დაჩაგრულის დასაცავად ტყუილად არ უბრძოლია! ახლა გვჭირდებით, რომ თუნდაც სიმბოლური ერთი ლარით გამოხატოთ თქვენი პოზიცია, ერთად შემოვულაწუნოთ ქართულ, გამომძალველ, დაბრმავებულ სასამართლოს, ვინძლო გამოფხიზლდეს.

რა მნიშვნელობა აქვს, ვის მხარესაა სიმართლე, უკვე მთავარია, ვის უჭირავს იარაღი, ან ფული“ - წერს „ახლია“.

"რეპორტიორის" მინაწერი:

1. "რეპორტიორის" ჟურნალისტური კოლექტივი სოლიდარობას უცხადებს გაზეთ „ალიას“ და აცხადებს: ჩვენ არამარტო მხარს ვუჭერთ ალიელებს, არამედ მათ წინააღმდეგ აგორებულ ცილისმწამებლურ კამპანიას განვიხილავთ, როგორც ჩვენი-"რეპორტიორის" წინააღმდეგ გაჩაღებულ კამპანიას. აქედან გამომდინარე, უფლებას ვიტოვებთ კანონისა და ჟურნალისტიკის აღიარებული ეთიკური ნორმების დაცვით პასუხი გავცეთ მავანს და მავანს!

2. „რეპორტიორი“ მდიდარი არ არის, მაგრამ ჩვენ მოვახერხებთ "ალიას" მხარდასაჭერ საბანკო ანგარიშზე სიმბოლური თანხის გადარიცხვას!

3. დღეიდან  „რეპორტიორის“ არცერთი თანამშრომელი „ფრესკოს“ პროდუქციას არ იყიდის.

4. მოვუწოდებთ საქართველოს ჟურნალისტურ ოჯახს: მხარი დავუჭიროთ და გვერდში დავუდგეთ გაზეთ "ალიას", რომელსაც ებრძვიან იმიტომ, რომ იგი იცავს თავისი მკითხველების, ანუ საქართველოს მოსახლეობის ინტერესებს.

"რეპორტიორის" კოლექტივის სახელით-

გიორგი მამაცაშვილი,

გენერალური დირექტორი.

19 მისი, 2014 წ.