ბრაზილიაში ქართული კინოს კვირეული მიმდინარეობს. კვირეული 21-26 მაისს, საქართველოს დამოუკიდებლობის დღის აღსანიშნავად, ბრაზილიაში საქართველოს საელჩოს, კინემატოგრაფიის ეროვნული ცენტრისა და ბრაზილიის ბანკის კულტურის ცენტრის ხელშეწყობით არის ორგანიზებული. კვირეულის ფარგლებში ნაჩვენებ ფილმებს შორისაა "ჩემი ბებია", "გაღმა ნაპირი", "გაიღიმეთ", "ფიროსმანი" და "მონანიება".
საქართველოს საგარეო საქმეთა სამინისტროს ინფორმაციით, ქალაქ ბრაზილიაში პირველმა ქართულმა კულტურულმა ღონისძიებამ დიდი ინტერესი გამოიწვია, როგორც გახსნაზე მოწვეული საზოგადოების მხრიდან, ასევე ჩვენების მასპინძელი კულტურის ცენტრის საინფორმაციო მასალების მომხმარებლებს შორის. ქართული ფილმების ჩვენებით დაინტერესდა ბრაზილიის რიო გრანდე დო სულის საერთაშორისო კინო-ფესტივალი, რომელიც ივნისის თვეში იმართება.
ზემოხსენებულ ღონისძიებასთან დაკავშირებით ბრაზილიის ეროვნული რადიოს პირდაპირ ეთერში ელჩმა ოთარ ბერძენიშვილმა ისაუბრა.
