რამდენიმე წუთის წინ ცნობილი გახდა, რომ „კაზანტიპის“ ფესტივალზე ქართველი გოგონები უვიზოდ შევლენ. ინფორმაცია „facebook“-ის საკუთარ გვერდზე ტურიზმის დეპარტამენტის ხელმძღვანელმა გიორგი სიგუამ გამოაქვეყნა.

„ქართველი გოგონების საყურადღებოდ! დღეს, კაზანტიპის რესპუბლიკის მთავრობამ მიიღო გადაწყვეტილება გაგიუქმოთ სავიზო რეჟიმი და თქვენთვის ტერიტორიაზე შესვლა იქნება უფასო!“, -წერს სიგუა.

მანამდე, „კაზანტიპის“ რესპუბლიკის გადაწყვეტილებით, უვიზო რეჟიმით მხოლოდ უკრაინელი და ყირიმელი გოგონები სარგებლობდნენ.

„კაზანტიპი“ დამოუკიდებელი „მონარქიული რესპუბლიკაა“, რომელსაც ჰყავს მინისტრთა კაბინეტი, ასევე მონარქი, ამიტომ ფესტივალის ტერიტორიაზე შესვლა მხოლოდ მოქალაქის ნამდვილი ვიზით, ან შტრიხკოდიანი ყვითელი ჩემოდნის საშუალებითაა შესაძლებელი. ვიზა - ეს შტრიხ-კოდიანი პლასტიკური ბარათია ზონარზე, რომლის აღებაც საიტზევეა შესაძლებელი და მისი საფასური 200-250$-მდე ღირს. ყვითელი ჩემოდნის, ან ვიზის ტარება ფესტივალის ტერიტორიაზეც აუცილებელია, რადგან მის გარეშე შესაძლოა დაჯარიმდეთ, ან გამოგაგდონ.

20-დან 30 აგვისტომდე „კაზანტიპი“ ანაკლიის ტერიტორიაზე გაიმართება. როგორც ფესტივალის  ორგანიზატორები წერენ, ანაკლიაში ფესტივალის გამართვის მიზეზი მათგან დამოუკიდებელი მიზეზების გამო მიიღეს და ეს სახელმწიფო მოწყობისა და საკანონმდებლო ბაზის შეცვლამ განაპირობა.