ე.წ. სამხრეთ ოსეთის გუნდი ბოლო დრომდე მონაწილეთა შორის არ იყო, თუმცა კვებეკის ნაკრებმა მონაწილეობაზე უარი განაცხადა და მის ნაცვლად ორგანიზატორებმა დე ფაქტო სამხრეთ ოსეთი ჩასვეს. ჩემპიონატი სკანდინავიაში 1-12 ივნისს გაიმართება.

მესამე ჯგუფში სამხრეთ ოსეთის მეტოქეები არიან დარფური და პადანია. დე ფაქტო აფხაზეთის ნაკრები მეორე ჯგუფშია აკვიტანიისა და საპმის გუნდებთან ერთად.

დე ფაქტო სამხრეთ ოსეთის ნაკრების წევრები ცხინვალში „პრეზიდენტმა" ლეონიდ თიბილოვმა მიიღო.

„მსოფლიოს ჩემპიონატზე მონაწილეობა ძალიან მნიშვნელოვანი მოვლენაა ჩვენი, ახალგაზრდა ქვეყნისთვის. იმედი მაქვს, რომ გამარჯვებულები დაგვიბრუნდებით", - განაცხადა ლეონიდ თიბილოვმა.

„აფხაზეთის ნაკრებში" ვეტერანი ნახევარმცველი რუსლან აჯინჯალი თამაშობს, რომელიც „კრილია სოვეტოვში" ალექსანდრე ამისულაშვილის თანაგუნდელია, ხოლო ე.წ. სამხრეთ ოსეთის ნაკრებში ირიცხება ვინმე რომეო კობალაძე, რომელიც რუსულ „სტოლიცაში" თამაშობს.

1-ელ ივნისს აფხაზები აკვიტანიას შეხვდებიან, 3 ივნისს ოსები - პადანიას.