„ნაპოლის“ ყოფილმა ფეხბურთელმა დიეგო მარადონამ შეაქო თავისი თანამემამულე გონსალო იგუაინი, რომელიც წლის განმავლობაში კლუბის ერთ-ერთ ლიდერად მოგვევლინა.
შეგახსენებთ, რომ გონსალო იგუაინი გასული წლის ზაფხულში მადრიდის „რეალიდან“ გადაბარგდა იტალიაში. მისი სატრანსფერო ღირებულება 40 მილიონ ევროს წარმოადგენდა. გონსალომ პირველივე სეზონში 22 გოლის გატანა მოახერხა.
„ჯერ კიდევ 2010 წელს ვთქვი, რომ მას ბევრი მუშაობა სჭირდებოდა. მე ვხედავდი მის განვითარებას და იმას, რომ ჩემპიონი გახდებოდა.
როცა გონსალო ფორმაშია - შედეგს აღწევს. იგუაინმა არა მარტო სერია A, არამედ არგენტინის ნაკრებთან ერთად მსოფლიო ჩემპიონატიც უნდა მოიგოს.
მაგრამ გონსალოს მარტოს არ შეუძლია ტიტულის მოპოვება. ნეაპოლური კლუბის პრეზიდენტმა აურელიო დე ლაურენტისმა დაუშვა გარკვეული შეცდომები. ასე რომ, „ნაპოლის“ აქტიური სატრანსფერო კამპანიის წარმართვა ესაჭიროება“, - განაცხადა „ფეხბურთის ღმერთმა“.
