საპარლამენტო უმრავლესობის წევრმა, დავით ლორთქიფანიძემ „რეპორტიორთან“ სატელეფონო საუბარში ვანში მომხდარ აფეთქებასთან დაკავშირებით განცხადება გააკეთა. მისი თქმით, ოჯახს სადაც აფეთქება მოხდა ბოლო პერიოდის განმავლობაში ატერორებდნენ და დისკომფორტს უქმნიდნენ.

„სოფელ ზედა ვანში აფეთქება მოხდა, რომელსაც ახალგაზრდა გიორგი თვალარბეიშვილის სიცოცხლე შეეწირა. ოჯახის წევრების თქმით, მათი მისამართით ხდებოდა ზეწოლა და ოჯახის წევრებს ატერორებდნენ. “

ლორთქიფანიძის თქმით, რაიონიდან დაბრუნებულმა გიორგიმ ეზოში შემთხვევით აღმოაჩინა ნივთი, რომელიც ჩათვალა, რომ იყო მანქანის ნაწილი და მისი გასინჯვის მიზნით შეაერთა აკუმულიატორზე, რამაც აფეთქება გამოიწვია და ფატალური შედეგით დასრულდა.

„იყო სხვადასხვა ვერსიები გავრცელებული, თითქოს გაზის ბალონი აუფეთქდა მანქანაში, მაგრამ ეს ინფორმაცია სიმართლეს არ შეესაბამება. ეზოში ნაპოვნი, ცელოფანში ჩადებული ნივთი აფეთქდა, რის შედეგადაც გიორგი ადგილზევე გარდაიცვალა.“

დავით ლორთქიფანიძის ინფორმაციით, ჩასულები არიან შესაბამისი სპეც სამსახურები, ექსპერტიზა ჩაუტარდება გარდაცვლილის გვამს და დაადგენს თუ რამ გამოიწვია რეალურად ეს აფეთქება, რომელმაც სიცოცხლე მოუსწრაფა ახალგაზრდა, 25 წლის ბიჭს.

მიმდინარეობს გამოძიება, სისხლის სამართლის საქმე სიცოცხლის მოსპობის მუხლით არის აღძრული.