ზუგდიდში „ნაციონალური მოძრაობის“ ოფისთან ხმაურიანი აქცია გაიმართა. ოფისთან 2008 წლის 27 აგვისტოს მოკლული პაატა ქარდავას ოჯახის წევრები და ნათესავები შეიკრიბნენ.
მათ პრეტენზიები „ნაციონალური მოძრაობის” გამგებლობის კანდიდატ თენგიზ გუნავასთან ჰქონდათ, რომელიც მაშინ სამეგრელო - ზემო სვანეთის სამხარეო პოლიციის უფროსი იყო.
აქციის მონაწილეები “ნაციონალების” ოფისთან სკანდირებენ „გუნავა მკვლელია, პაატა ქარდავას სისხლში გასვრილია“.
აქციის მონაწილეები გუნავასთან ერთად სამეგრელო-ზემო სვანეთის ყოფილი გუბერნატორის ზაზა გოროზიას დასჯასაც ითხოვენ. ფიზიკური დაპირისპირება ზუგდიდში ამ წუთებშიც მიმდინარეობს.
“ნაციონალები” მომხდარს პროვოკაციას და ხელისუფლებისგან მართულს უწოდებენ, აქციის მონაწილეები კი ამ ბრალდებას უარყოფენ და აცხადებენ, რომ გუნავას ჩადენილი დანაშაულისთვის უპისპირდებიან.
შეგახსენებთ, რომ თავდაცვის სამინისტროს დაზვერვის ოფიცრის პაატა ქარდავას მკვლელობაში ოჯახი თენგიზ გუნავასაც ადანაშაულებს და მის დასჯას ითხოვს. ქარდავა 2008 წლის აგვისტოში გაუჩინარდა. საქმის გახსნის შესახებ შსს-მ განცხადება გუშინ გააკეთა.
