„საქართველოს შინაგან საქმეთა მინისტრს, ალექსანდრე ჭიკაიძეს მოვუწოდებთ, სასწრაფოდ დააბრუნოს ბათუმის კუთვნილი მოტოციკლები", - განაცხადა ბათუმის საკრებულოს თავმჯდომარის მოადგილემ, „ნაციონალური მოძრაობის" წევრმა ჯუმბერ კახიძემ დღეს გამართულ ბრიფინგზე.

მისი ინფორმაციით,2007 წელს ბათუმის თვითმმართველობის ბიუჯეტით ნაყიდი სამი მოტოციკლი, ალექსანდრე ჭიკაიძის დავალებით, კახეთში გადაიტანეს. ამასთან კახიძე განმარტავს, რომ  მოტოციკლების კახეთში გადატანა 30 მაისს ბათუმში პოლიციის დღისადმი მიძღვნილი ღონისძიების შემდეგ განხორციელდა.

„ყველას კარგად გვახსოვს, ამ მოტოციკლებით სამართალდამცველები როგორ პატრულირებდნენ ქალაქში. როგორც გავიგეთ, 30 მაისის ღონისძებაზე, შინაგან საქმეთა მინისტრს, ალექსანდრე ჭიკაიძეს მოეწონა მოტოციკლები და ბრძანა მისი გადატანა კახეთის ტერიტორიაზე. მინისტრს მოვუწოდებ, სასწრაფოდ დააბრუნოს ბათუმის კუთვნილი ქონება", - განაცხადა ჯუმბერ კახიძემ.