„ქართული პარტიის" გორის ორგანიზაციის ლიდერის კახა ერგემლიძის მშობლიურ სოფელში „ქართულმა პარტიამ" არჩევნები წააგო. ზემო ნიქოზში „ქართული ოცნების" რაიონის გამგებლობის კანდიდატს 140-მა ამომრჩეველმა, ხოლო „ქართული პარტიის" გამგებლობის კანდიდატს - 131-მა ამომრჩეველმა მისცა ხმა. სულ ზემო ნიქოზში არჩევნებში მონაწილეობა (720-დან) 380-მა ამომრჩეველმა მიიღო მონაწილეობა.

შიდა ქართლის საინფორმაციო ცენტრის ინფორმაციით, „ქართულმა პარტიამ" არჩევნები ქვემო ნიქოზშიც წააგო. კერძოდ, რაიონის გამგებლობის კანდიდატს „ქართული ოცნებიდან" 256-მა მისცა ხმა, ხოლო „ქართული პარტიის" კანდიდატს - 203-მა. ამომრჩევლების საერთო რაოდენობა 1144. ხოლო არჩევნებში მონაწილეობა 568-მ მიიღო. რაც შეეხება პარტიულ არჩევანს, ზემო ნიქოზში „ქართულმა ოცნებამ" და „ქართულმა პარტიამ" ხმები 140-140-ზე გაიყვეს. ხოლო ქვემო ნიქოზში 241 ხმა „ქართულ ოცნებას", ხოლო 215 ხმა „ქართულ პარტიას" ერგო.

2014 წლის 16 ივნისის დილის მონაცემებით, რაიონის 73-უბნიდან დათვლილია 65 უბანი.

„ქართული ოცნება" (დავით ონიაშვილი) 45,8%, „ქართული პარტია" (ბონდო ვათიაშვილი) 26,85%, „ნაციონალური მოძრაობა" (კახა ტოლიაშვილი) 16,5%.

ტყვიავის საჯარო სკოლის შენობაში განთავსებულ ორივე უბანზე ირაკლი ოქრუაშვილის „ქართულმა პარტიამ" და მისმა კანდიდატებმა არჩევნები წააგეს. იმ უბანზეც კი, სადაც ტყვიაველები ოქრუაშვილის მოგებას ფიქრობდნენ, „ქართულმა პარტიამ" 35 ხმით წააგო. „გიგუანთ უბნის" მონაცემების მიხედვით, „ქართული ოცნება" - 263 „ქართული პარტია"- 228. ეს ის უბანია, სადაც ოქრუაშვილი ცხოვრობს. აქ 1145 ამომრჩევლიდან უბანზე 567 ამომრჩეველი მივიდა.

რაც შეეხება „ქარელაანთ უბნის" მონაცემებს, იქ ოქრუაშვილის მოგებას თავიდანვე არც ვარაუდობდნენ და სხვაობა ბევრად მეტია. 281 ხმა „ქართულ ოცნებას", ხოლო „ქართულ პარტიას" - 214. ამ უბანზე კი საერთო ამომრჩევლის რაოდენობა 1120.