სოფლის მეურნეობის სამინისტროს სურსათის ეროვნული სააგენტო კახეთში საშიში მავნებლის - იტალიური კალიის წინააღმდეგ წამლობას ავიაციით ახორციელებს. დედოფლისწყაროს მუნიციპალიტეტში ნათესების წამლით დამუშავების პროცესს სოფლის მეურნეობის მინისტრის პირველი მოადგილე ოთარ დანელია და სურსათის ეროვნული სააგენტოს უფროსი ზურაბ ჩეკურაშვილი ესწრებოდნენ.
ამ ეტაპზე აღმოსავლეთ საქართველოში 25649 ჰა ფართობია დამუშავებული. წამლობა სამანქანო დანადგარებით მავნებლის დაჭუპრებამდე გაგრძელდება. აღნიშნული ღონისძიება სახელმწიფო მიზნობრივი პროგრამის „მცენარეთა დაცვა და ფიტოსანიტარიული კეთილსაიმედოობის" ფარგლებში აღმოსავლეთ საქართველოში 6 მაისიდან დაიწყო. თავდაპირველად დამუშავდა მავნებლის გავრცელების კერები კახეთისა და ქვემო ქართლის რეგიონში. ამ ეტაპისთვის სპეციალური სამანქანო ტექნიკით შეწამლულია 15749 ჰა ფართობი. მავნებლის ძლიერი გავრცელების გამო 23 მაისიდან საჭირო გახდა ავიაციის გამოყენება, რომლის საშუალებითაც შეიწამლა სამანქანო დანადგარებით მიუდგომელი ფართობები, სასოფლო-სამეურნეო კულტურები და საძოვრები. ამ ეტაპზე ავიაციით დამუშავებულია 9 900 ჰა.
სახელმწიფო პროგრამის მიხედვით, სამუშაოების ჩატარება 26 000 ჰა ფართობზე იყო დაგეგმილი, მაგრამ საჭიროებიდან გამომდინარე დამუშავდება მეტი ფართობი.
