თბილისის მერის გიგი უგულავას განცხადებით, მასთან დაკავშირებული სასამართლო პროცესი თითიდან გამოწოვილი და პოლიტიკურად მოტივირებულია. ამის შესახებ უგულავამ თბილისის საქალაქო სასამართლოში სხდომის დასრულების შემდეგ განაცხადა.
"დღევანდელი დაკითხებიდან გამოჩნდა, რომ ბნელ ოთახში ეძებენ კატას. ეს გაყიდვა იყო საჯარო, ყველა მაშინ მოქმედი ტელევიზია თუ მედიასაშუალება ესწრებოდა მიწის კომისიის ყველა სხდომას და ეს კომისიის წევრებმაც დაადასტურეს, რომ იყო შეჯიბრებითობა და სსხვადასხვა წინადადებები. თქვეს კიდეც კომისიის წევრებმაც, რითი იხელმძღვანელეს - ერთი იყო ფისკალური ეფექტი ანუ ის თანხა, რომელსაც კერძო კომპანია ბიუჯეტში გადაიხდიდა და მეორე, პრინციპულად წინააღმდეგი იყო კომისიაც და მერიაც, რომ იქ რაღაც საცხოვრებელი სახლები აშენებულიყო. ასე რომ, ეს არის თავიდან ბოლომდე თითიდან გამოწოვილი, პოლიტიკურად მოტივირებული პროცესი. რა ვქნა, კანონი ითხოვს, ვმონაწილეობ ამ პროცესში და შედეგსაც დავინახავთ. მეც მაინტერესებს. მოვიდეს ვიგინდარა ჯოზეფ ქეი და მისცეს სასამართლოზე ჩვენება და რას იბლუყუნებს, ამას საზოგადოება ნახავს", - განაცხადა გიგი უგულავამ.
შეგახსნებთ, რომ თბილისის მერის გიგი უგულავასა და თავდაცვის ყოფილი მინისტრის დავით კეზერაშვილის პროცესი 18 სექტემბერს, ბრალდების მხარის მოწმეების დაკითხვით განახლდება.
