საქართველოს პრემიერ-მინისტრმა ირაკლი ღარიბაშვილმა კოოპერაციის საერთაშორისო დღე ფერმერებს მიულოცა და გამართულ ღონისძიებაზე ხელისუფლების მიერ გატარებული რეფორმების შესახებ ინფორმაცია მიაწოდა.
პრემიერმა სასოფლო-სამეურნეო კოოპერაციებში ფერმერთა ნებაყოფლობით გაერთიანების მნიშვნელობაზე ისაუბრა.
“ ბედნიერი ვარ, რომ სწორედ ჩვენი მთავრობის პირობებში დაიწყო მეურნეობების კონსოლიდაცია, გაერთიანება უფრო მეტი შემოსავლის, დოვლათის, სარგებლის მისაღებად. სწორედ ჩვენს მიერ სოფლის მეურნეობაში დაწყებულმა რეფორმებმა მისცა სტიმული ამ პროცესს. მისასალმებელია, რომ უმოკლეს დროში უკვე შეიქმნა 100-მდე სასოფლო-სამეურნეო კოოპერაციული გაერთიანება. მასში გაწევრიანებული ფერმერები, გლეხები, მეწარმეები ერთიანი ძალისხმევით, ერთიანი ადამიანური, მატერიალური, ტექნიკური რესურსით შეძლებენ დანერგონ ახალი ტექნოლოგიები, აწარმოონ მაღალი სტანდარტის ხარისხიანი პროდუქცია და დაიმკვიდრონ ადგილი როგორც ადგილობრივ, ისე საერთაშორისო ბაზრებზე. ეს გზა გაიარა ევროპამ, ეს გზა გაიარა ყველა განვითარებულმა ქვეყანამ.
რესურსების კონსოლიდაცია, მეურნეობების გაფართოება განსაკუთრებით აქტუალური და მნიშვნელოვანი გახდა ახლა, როცა ხელი მოვაწერეთ ევროკავშირთან ასოცირების შეთანხმებას. ხელმოწერის შემდეგ, დღეს, ჩვენ, პოლიტიკურთან ერთად, უმნიშვნელოვანესი ეკონომიკური შესაძლებლობებიც გაგვიჩნდა”, - აღნიშნა ირაკლი ღარიბაშვილმა.
ღარიბაშვილის თქმით, უახლოეს მომავალში მთავრობა უამრავ ახალ ინიციატივას შესთავაზებს მცირე და საშუალო მეწარმეებს, რაც ბიზნესის გაფართოებისკენ იქნება მიმართული.
