რუსეთის საგარეო საქმეთა მინისტრის მოადგილის გრიგორი კარასინის თქმით, თუ კი აღმოჩნდება, რომ ასოცირების შეთანხმების გავლენა ძალიან სერიოზული იქნება, აღნიშნული ფაქტი რუსი ბიზნესმენების მხრიდან ცუდად აღიქმება. ეს განცხადება კარასინმა საქართველოს სპეციალურ წარმომადგენელთან რუსეთთან მოლაპარაკებების საკითხებში, ზურაბ აბაშიძესთან შეხვედრის შემდეგ გააკეთა. 

პრაღაში, აბაშიძე-კარასინის შეხვედრის ძირითადი ნაწილი სავაჭრო ურთიერთობებთან დაკავშირებულ საკითხებს დაეთმო. კარასანის განმარტებით, მოსკოვში ჯერ კიდევ უნდა გაანალიზდეს, თუ რა რეალობა შეიძლება შეიქმნას ასოცირების შეთანხმების საფუძველზე. რუსული მხარე გარკვეულ ცვლილებებს არ გამორიცხავს. 

"გვჭირდება ღია და კონკრეტული საუბარი, თუ როგორ გავლენას მოახდენს ორმხრივ სავაჭრო ურთიერთობებზე. ბოლო პერიოდში, ორივე მხარის ძალისხმევის შედეგად, ქართული პროდუქციის ექსპორტი ოთხჯერ გაიზარდა. ტვირთბრუნვა, საერთო ჯამში, გაიზარდა 50%-ით. რაზე უნდა ვიყოთ მომავალში ორიენტრიებული, რა ტარიფები იქნება... გავლენა რომ ექნება, ეს ცხადია და უნდა ავწონოთ და შევაფასოთ, რათა არ იყოს ნეგატიური სიურპრიზები. თუ კი უეცრად აღმოჩნდება, რომ გავლენა სერიოზულია, მაშინ ეს ძალიან ცუდად იქნება აღქმული ჩვენი საზოგადოების და ბიზნესმენების მხრიდან. ისე უნდა გავაკეთოთ, რომ ყველაფერი იყოს სამართლიანად", - აღნიშნა კარასინმა. 

გრიგორი კარასინის  განცხადება "საზოგადოებრივმა მაუწყებელმა" გაავრცელა. 

(მოამზადა ნინი მოდრეკილმა)