საქართველოს ეკონომიკის მინისტრმა გიორგი კვირიკაშვილმა თბილისი-მესტია-თბილისის ავიარეისის ამოქმედების მნიშვნელობაზე ისაუბრა და აღნიშნა, რომ მესტიის მიმართულებით რეგულარული ავიარეისები ტურისტული პოტენციალის უკეთ წარმოჩენას ხელს შეუწყობს.

"ავიარეისების აღდგენის საკითხებზე მუშაობისას ჩვენ განვიხილეთ სხვადასხვა ალტერნატივა, ჩავატარეთ კონსულტაციები და შედეგად გამოცხადდა საჯარო ტენდერი.  მოხარულები ვართ, რომ ღია და გამჭვირვალე საჯარო ტენდერის პროცესში გაიმარჯვა სწორედ ქართულმა ავიაკომპანიამ, რაც ქართული ავიაციის განვითარებაში კიდევ ერთი წინ გადადგმული ნაბიჯია", - აღნიშნა მინისტრმა. 

კვირიკაშვილის განმარტებით, ტურიზმის ხელშეწყობის მიზნით, მნიშვნელოვანია საქართველოში მცირე ავიაციის განვითარება, ქართული ავიაკომპანიების გაძლიერება და რეგიონული მცირე აეროპორტებისა და აეროდრომების ინფრასტრუქტურის მოდერნიზაცია. 

"ეს არის პროცესი რომელზეც ჩვენ აქტიურად ვმუშაობთ და ნატახტარის აეროდრომიდან მესტიის მიმართულებით რეისების შესრულება ამ პროცესის შემადგენელი ნაწილია. ტენდერში ქართული კომპანიის გამარჯვება ნიშანდობლივია იმ მიმართულებითაც, რომ კომპანიას საშუალება ექნება მოამზადოს და გადაამზადოს ქართველი მფრინავები და ტექნიკური პერსონალი, რაც ასევე უაღრესად მნიშვნელოვანია ქართული მცირე ავიაციის შემდგომი განვითარებისთვის," - განაცხადა კვირიკაშვილმა. 

მესტიის მიმართულებით რეისები 18 ივლისიდან დაიწყება. რეისები კვირაში სამჯერ,  ორშაბათს, ოთხშაბათს და პარასკევს ქნება. ბილეთის ღირებულება 65 ლარია ( ერთი მიმართულებით).  ფრენებს ქართული ავიაკომპანია "სერვისეირი" შეასრულებს.

(მოამზადა ნინი მოდრეკილმა)