სახალხო დამცველი უჩა ნანუაშვილი 2013 წლის ივნისში მერიის და საკრებულოს თანამშრომლების დაკავება დარღვევად შეაფასა. მისი თქმით, მომხდარზე გამოძიება უნდა დაიწყოს. ნანუაშვილმა აღნიშნული განცხადება პარლამენტის ადამიანის უფლებათა კომიტეტის სხდომაზე 2013 წლის ადამიანის უფლებების მდგომარეობის შესახებ ანგარიშის წარდგენისას განაცხადა.
"ფინანსთა სამინისტროს საგამოძიებო სამსახურის მიერ 2013 წლის ივნისში მერიის და საკრებულოს თანამშრომლების დაკავება ჩვენი მხრიდან შეფასებულია, როგორც დარღვევა. 22 ადამიანის დაკავებაზე გამოძიების ჩატარება აუცილებელია", - განაცხადა ნანუაშვილმა.
სახალხო დამცველის თქმითვე, 2013 წელს, წინა წლებთან შედარებით სასამართლო არასაპატიმრო ხასიათის აღკვეთის ღონისძიებებს ნაკლებად იყენებდა, თუმცა კანონდარღვევის ფაქტებიც ფიქსირდებოდა.
"სტატისტიკური მონაცემები ცხადყოფს, რომ გასული წელს სასამართლოები უფრო ხშირად იყენებდნენ არასაპატიმრო ხასიათის აღკვეთის ღონისძიებებს, თუმცა იყო დარღვევებიც. ერთ-ერთ ფაქტად მოყვანილია მელნიკოვის საქმე. მის საქმეში, ექსტრადაციის შემდეგ, მოსამართლემ არ განიხილა სასამართლოს მიერ აღკვეთის საკითხი, რაც კანონდებლობის დარღვევაა და მელნიკოვი თვეზე დიდხანს იყო უკანონო პატიმარი", - განაცხადა ნანუაშვილმა.
ნანუაშვილმა ე.წ ტრაქტორების საქმეზეც გააკეთა კომენტარი და განაცხადა, რომ საქმეზე გამოძიების სრულყოფილად ჩატარება აუცილებელია.
